كلام

بقلم رمزي دحرج
خبيت الكلام جوايا
مخنوق يا قلبي
و انت مش معايا
حتي كمان
مش عايز تسمع غنايا
سايب عيني حيرانه
و الدموع جواها
محبوسه …منكوسه
و عيونك مش شيفاها
يا مين يفهمها يا مين يريحها
و يحس باللي جواها
كلامك يا قلبي كلام مسجون
كلام مجنون
كلام متلون بالف لون
خلاني عايش و مش عايش
خلاني تايه
خايف اقول اللي جوايا
مش لاقي حد يفهمني
حد يسمعني
الخوف كاتم علي نفسي
علي قلبي يموتني
عايز انادي عايز اصرخ
عايز اضحك بهستيريا
عايز اطير مع الفرحه
عايز اعيش انا في خلوه
عايز اموت انا في غنوه
بلون الدم موصوفه
و في سطوري مرصوصه
و في حروف اسمي تكون مهووسه
خايف يا قلبي من الدوشه
خايف من الهوسه
خايف اصحي الصبح تجيلي لوثه
دا لون الدم يشجيني
بيتعبني بيألمني
يا هم ابعد بقي عني
يا حيره ليه ملازماني
سبيني بقي انا في حالي
دا انا حالي ماهو حالي
سبيني اعيش في اشعاري
اعيش جوه دفاتري مع اقلامي
يا حيره ليه حيرتي افكاري
يا دنيا ليه بتذودي ناري
كفايه انا اللي بيجرالي
من حبيبي و هو مش داري
رمزي دحرج